Չգրանցված դեղերը խնդիր են բոլորի համար

Հայկական շուկայում ժամանակ առ ժամանակ հայտնաբերվում են չգրանցված, ժամկետանց դեղեր. 2010 թ.-ի վերջին քառորդին դեղատներում անցկացված ստուգումների արդյունքում հայտնաբերվել է մեծ քանակությամբ չգրանցված և ժամկետանց դեղեր: Որոշ դեղատների լիցենզիաները կասեցվել են:

Aysor-ի թղթակցի հետ զրույցում ՀՀ առողջապահության նախարարի խորհրդական Սուրեն Քրմոյանը տեղեկացրեց, որ դեղատներում հայտնաբերված չգրանցված դեղերի առգրավումը «որակ չի տալիս, քանի որ ստուգվել է ընդամենը 20-30 դեղատուն»:

«Չգրանցված դեղերի խնդիր մենք, իրոք, ունենք»,- շեշտեց Ս. Քրմոյանը և հավելեց, որ վերահսկողություն է իրականացվում, որի նպատակը չգրանցված դեղերի հայտնաբերումն է:

Առողջապահության նախարարի խորհրդականի խոսքերով` վերահսկողության արդյունքում կտրուկ նվազել է այն ընկերությունների թիվը, որոնք չգրանցված դեղեր են վաճառում:

Ինչ վերաբերում է դեղերը չգրանցելու պատճառներին, ապա Սուրեն Քրմոյանը նշեց, որ որոշ դեղեր մեծ պահանջարկ ունեն, սակայն արտադրող ընկերությունը չի ցանկանում գրանցվել: Այս դեպքում պատճառը ֆինանսական, մարկետինգային է:
Այդ իսկ պատճառով կենսական անհարժեշտությն դեղերը գրանցվում են պետական բյուջեի հաշվին: Այդպիսի միջոցների ցանկում 11 դեղ կա:

Դեղ արտադրողների և ներմուծողների միության նախագահ Սամվել Զաքարյանը նույնպես անհանգստացած է շուկայում շրջանառվող կեղծ և չգրանցված դեղերի խնդրով:

«Թե’ արտադրողների, թե’ ներմուծողների, թե’ դեղ արտադրող ընկերությունների ներկայացուցիչներին վնասում է շուկայում շրջանառվող կեղծ, ժամկետանց դեղերի վաճառքը»,- շեշտեց ԴԱՆ միության նախագահը:

Նա նաև տեղեկացրեց, որ փետրվար ամսին նախատեսում են մոնիտորինգ իրականացնել Հայաստանի դեղատներում` իրավիճակը ստուգելու համար:

Հարցեր, պատասխաններ, մեկնաբանություններ